Heiðarskóli

  • Heiðarskóli
Miðvikudagur, 25. apríl 2018

Í dag var haldin umhverfisráðstefna Heiðarskóla í tilefni af DEGI UMHVERFISINS. Ráðstefnan hófst á fróðlegu innleggi frá umhverfsinefndinni um umhverfisvænar vörur sem hægt er að velja í stað þeirra sem eru framleiddar úr plasti. Starfsmenn skólans og Verslunin Kaja á Akranesi sáu um að lána skólanum vörurnar sem verða svo til sýnis í glerskáp á efri hæð skólans á næstunni. Færum við þeim bestu þakkir fyrir. Umhverfsinefndin kynnti svo nýjan umhverfissáttmála skólans: 

GERÐU ÞAÐ SEM ER BEST FYRIR UMHVERFIÐ - EKKI ÞAÐ SEM ER AUÐVELDAST :)

  • Heiðarskóli
Föstudagur, 13. apríl 2018

Í gær var haldin undirbúin rýmingaræfing í Heiðarskóla. Brunabjallan var sett í gang og starfsmenn skólans rýmdu skólann samkvæmt þar til gerðri áætlun. Rýmingin tókst vel. Eftir æfinguna æfði starfsfólk skólans handtökin með slökkvitæki. Við þökkum slökkviliðsmönnum frá Akranesi kærlega fyrir aðstoðina. Síðan stendur til að halda fljótlega óundibúna æfingu. 

Þriðjudagur, 10. apríl 2018

Í dag var lokahátíð Stóru upplestrarkeppni samstarfsskólanna á Vesturlandi haldin í Heiðarskóla. Níu fulltrúar frá Grunnskólanum í Borgarnesi, Auðarskóla, Heiðarskóla og Grunnskóla Borgarfjarðar tóku þátt. Segja má að allir þátttakendur hafi verið sigurvegarar því allir höfðu æft vandaðan upplestur og lagt mikið á sig til að gera sitt allra besta. Dómnefnd var skipuð Hjördísi Hjartardóttur, grunnskólakennara frá Akranesi, Ingibjörgu Einarsdóttur, formanni Radda og Björk Einisdóttur varaformanni Radda.

  • Heiðarskóli
Fimmtudagur, 5. apríl 2018

Í dag var smásagan Pissupásan eftir Ævar Þór Benediktsson frumflutt á RÚV til að halda upp á Dag barnabókarinnar. Nemendur Heiðarskóla hlustuðu á söguna og unnu verkefni upp úr henni. Á hverju ári á degi barnabókarinnar er ný íslensk smásaga frumflutt samtímis í öllum grunnskólum landsins. IBBY samtökin á Íslandi skipuleggja þennan viðburð.Tilgangurinn er að fagna degi barnabókarinnar með notalegri sögustund og vekja um leið athygli á sameiningarmætti skáldskaparins. Á meðfylgjandi mynd má sjá börnin í 1. og 2. bekk hlusta á söguna. 

 

Föstudagur, 23. mars 2018

Árshátíð Heiðarskóla var haldin fyrir fullu húsi í gær. Nemendur í 3. og 4. bekk sýndu leikritið Klikkaða tímavélin og nemendur í unglingadeild sýndu leikritið Fjórir hljómar. Nemendur hafa undanfarið lagt mikið á sig við æfingar og jafnframt spáð í alls kyns hluti sem þarf að huga að þegar sett er upp leiksýning. Bæði leikritin voru stórskemmtileg og greinilegt að börnin höfðu metnað fyrir verkefninu. Að hátíð lokinni var boðið upp á dýrindis kaffihlaðborð í boði foreldra nemenda í 7. - 10. bekk. Línuhappdrættið var einnig á sínum stað þar sem dregin voru út páskaegg.

Pages