Skólasamstarf

Í þessari viku byrjaði skólasamstarfið okkar aftur eftir frí. Þrátt fyrir töluverða fjarlægð á milli Skýjaborgar og Heiðarskóla leggjum við áherslu á að halda góðu samstarfi skólastiganna. Skipulagðir eru 7-8 dagar á hverri önn þar sem elsti árgangur í Skýjaborg fer ásamt kennara með rútu í Heiðarskóla eða fer í vettvangsferð með 1. bekk utan veggja skólans. Myndast hefur hefð í skólaheimsóknum að íþróttakennari tekur á móti börnunum, fyrir áramót fara þau í íþróttir og eftir áramót í sund. Fyrsta ferð ársins gekk vel og nutu börnin sín vel í sundi. Eftir sund fara þau yfir í Heiðarskóla og gera misjafna hluti eftir áhuga hverju sinni. Í þessari viku skoðuðu þau meðal annars listgreinastofurnar. 

Markmið samstarfs á milli skólastiganna er að:

• Skapa samfellu í uppeldi og námi barna í leik- og grunnskóla.
• Stuðla að vellíðan og öryggi barna við að fara úr leikskóla í grunnskóla.
• Hlusta á raddir barna og foreldra, efla lýðræði og áhrif þeirra á skólaskilin.
• Byggja upp gagnkvæma þekkingu og skilning á starfi starfsmanna þvert á skólastigin.
• Skapa samræðugrundvöll milli starfsfólks leik- og grunnskóla.
• Tryggja upplýsingamiðlun milli skólastiganna.
• Auka símenntun starfsmanna þvert á skólastigin.