Skýjaborg fær sinn áttunda grænfána

Við áttum góða stund í gær þar sem Ósk frá Landvernd kom í heimsókn til okkar. Ósk gerði Grænfánaúttekt og fundaði með Rósahóp, elsta árgangi leikskólans, sem sitja öll saman í umhverfisnefnd barna. Ósk og barnahópurinn ræddu meðal annars mikilvægi umhverfismenntar, að passa upp á rusl, endurnýta hluti og að leika úti í náttúrunni.

Að lokum var Grænfánaafhending þar sem Rósahópur fékk það hlutverk að taka á móti viðurkenningu Skóla á grænni grein og Grænfánanum. En þetta var í áttunda skiptið sem Skýjaborg hlýtur þessa viðurkenningu og fengum við eftirfarandi endurgjöf með:

„Leikskólinn heldur áfram að standa sig vel í Grænfánaverkefninu. Margt orðið að föstum lið eins og endurnýting á efnivið, fjölbreytt nýting á náttúrulegum efnivið, skógarferðir og útivera, fuglafræðsla/skoðun, ræktun. Öll börn á leikskólanum fá tækifæri til þess að taka þátt í Grænfánastarfinu eftir aldri og þroska. Til fyrirmyndar er hvernig skólinn heldur upp á þá daga sem tileinkaðir eru náttúru og umhverfi. Hlökkum til að fylgjast með áframhaldandi Grænfánavinnu og minnum á að alltaf er hægt að hafa samband og óska eftir stuðningi eða fræðslu. Þið hafið náð þeim góða árangri að fá grænfánann afhentan í áttunda sinn. Innilega til hamingju með það!“

Fyrir áhugasama er Grænfánaskýrslu Skýjaborgar til síðustu tveggja ára að finna hér.