Fréttir af Heiðarskóla

Nemendur og starfsmenn Heiðarskóla hlupu Norræna skólahlaupið í dag.Verkefnið er eins og nafnið gefur til kynna samnorrænt en allir grunnskólar á Norðurlöndunum geta tekið þátt í hlaupinu á hverju hausti.

Dagur íslenskrar náttúru er í dag og af því tilefni fór skólastarfið fram í Brynjudal.Lagt var í hann með rútum strax eftir morgunmat í hávaðaroki og keyrt inn í Brynjudal, þar er mjög gott skjól og enginn varð var við rokið.

Í dag er Dagur læsis og af því tilefni hófum við skóladaginn á sameiginlegum yndislestri í matsal skólans.Börn og starfsmenn mættu með góða bók og lásu sér til ánægju og yndisauka í hljóði.

Börnin í 1.bekk horfðu hugfangin á skilaverkefni úr áhugasviðssmiðju í unglingadeild. Í áhugsviðssmiðju velja nemendur í unglingadeild hvað þeir vilja læra.Þeir velja viðfangsefni, setja sér markmið og gera vinnuáætlun um efnistök og skil.

Vinnusemi og metnaður voru alls ráðandi í fyrsta tíma í morgun.Unglingar voru ýmist að vinna verkefni í stærðfræði, íslensku eða samfélagsfræði.Miðstigið var í yndislestri og yngsta stig var í heimakrók í lestrarstund.

Nemendur miðstigs fóru í Borgarnes í gær og tóku þátt í miðstigsmótinu ásamt fleiri skólum.Keppt var í 60 og 600 m.hlaupum, langstökki, kúluvarpi og knattspyrnu.Veður var með besta móti og aðstæður til íþróttaiðkunar voru frábærar á Skallagrímsvellinum.

Nemendur miðstigsins fóru í gönguferð upp í Akrafjall.Gengið var upp frá vatnsveitu Akurnesinga og upp eftir Berjadalsánni.Ætlunin var að fara upp á Háahnúk en vegna vindáttar var farið í hina áttina og alveg upp að Guðfinnuþúfu sem er í tæplega 400 metra hæð.

Miðvikudaginn 26.ágúst fór allt yngsta stigið í haustferðina sína.Haldið var að Þórisstöðum þar sem Alla tók vel á móti hópnum.Margt var í boði, margir fóru í fótboltagolf og svo fundu börnin prýðis berjaland þar sem sumir náðu að fylla ílátin sín af gómsætum berjum.

Í gær fóru nemendur okkar í 8.- 10.bekk í hjólaferð.Hjólað var frá Heiðarskóla í Skátaskálann í Skorradal.Hópurinn gisti í skálanum í nótt.Hjólaferðin gekk vonum framar og voru allir sáttir og sælir, bæði nemendur og kennarar.

Eins og fram kom í ræðu skólastjóra á skólasetningu verður unnið að gerð læsistefnu fyrir Leik- og grunnskóla Hvalfjarðarsveitar í vetur.Mikil áhersla er á lestur og læsi í sínum víðasta skilningi í Heiðarskóla enda einn af grunnþáttum aðalnámskrár.