Fréttir af Skýjaborg

Elsti árgangurinn var útskrifaður með formlegri athöfn fimmtudaginn 14. maí, en með breyttu sniði þetta árið v/COVID-19 og gátu foreldra því ekki verið viðstaddir. Útskriftarbörnin fengu birkiplöntu að gjöf frá leikskólanum. Útskriftardagurinn var yndislegur það var hátíðarmatur í hádeginu og svo eftir útskriftina fékk hópurinn möffinskökur, allir ánægðir með daginn.

Það var viðburðarík vika hjá okkur í Skýjaborg í síðustu viku. Bolludagur var á mánudaginn með fiskibollum, rjómabollum. Mörg börnin útbjuggu bolluvönd. Sprengidagur var á þriðjudaginn með saltkjöti og baunasúpu. Öskudagur var á miðvikudaginn þar sem allir mættu í náttfötum eða búningi. "Poppið" var slegin úr tunnunni, haldið var ball, borðað popp og fleira skemmtilegt. Það var ekki annað að sjá en að allir skemmtu sér vel þennan dag.

Á konudaginn er hefð fyrir því að bjóða öllum konum í lífi barnanna í morgunkaffi og ekki var breyting þar á nú í ár. Mæting var góð og mátti sjá mömmur, ömmur og börn eiga góðir stundir saman í leik og spjalli. Við þökkum öllum kærlega fyrir komuna.

Í janúar/febrúar ár hvert útbúa börnin á regnboganum fuglafóður og gefa út. Það hefur svo sannarlega verið þörf á því núna þar sem óvenju snjóþungt hefur verið. Fuglarnir hafa látið sjá sig og borðað vel. Við hvetjum fólk til að gefa smáfuglunum einnig heima!

Í tilefni að "Degi leikskólans"bjóðum við gestum og gangandi að kíkja í heimsókn frá 9:00-10:30.

Á föstudaginn var rafmagnslaus dagur hjá okkur. Þann dag reynum við að takmarka eins og við getum notkun rafmagns. Við höfum ljósin slökkt og fáum mat sem er ekki eldaður í ofni. Börnum var boðið að koma með vasaljós þar sem ansi dimmt er úti langt fram eftir morgni þessa dagana. Mikil gleði var í vasaljósaleik að morgni. Morgunmaturinn var borðaður við kertaljós sem bjó til kósý stemningu.

Á föstudaginn héldum við upp á þorrann og höfðum þorrablót í hádeginu. Börn og starfsfólk var kvatt til að mæta í lopapeysum og settir voru upp víkingahjálmar sem búnir voru til. Boðið var upp á hangikjöt, rófur, gulrætur, kartöflur, jafning, súrmat, hákarl, sviðasultu og svið. Börnunum fannst sviðin spennandi, skoðuðu tunguna, tennurnar og fl. Eins og skiljanlegt er voru þau misdugleg að smakka, sumum þykir hákarlinn góður á meðan öðrum fannst nóg að þefa smá.

Á bóndadaginn er hefð fyrir því að bjóða öllum körlum í lífi barnanna í morgunkaffi og ekki var breyting þar á nú í ár. Mæting var góð og mátti sjá pabba, afa og börn eiga góðir stundir saman í leik og spjalli. Við þökkum öllum kærlega fyrir komuna.