Fréttir af Skýjaborg

Linda sveitarstjóri bauð öllum börnunum í leikskólanum að vera viðstödd í dag þegar kveikt var á ljósunum á jólatrénu við Stjórnsýsluhúsið. Sungið var og gengið í kringum jólatréð. Að lokum gaf Linda börnunum mandarínur sem allir gæddu sér á.

Á mánudaginn var Dagur íslenskrar tungu. Hann var óvenjulegur í ár hjá okkur (eins og svo margt annað). Við erum vön að fá 3. bekk í heimsókn til okkar sem hefur lesið fyrir börnin og einnig höfum við fengið íslenskan rithöfund sem hefur kynnt og lesið upp úr bók. En í ár buðum við engum í heimsókn. Tekin var umræða með börnunum og þau kynnt fyrir höfundinum Jónasi Hallgrímssyni, mikilvægi tungumálsins okkar. Sungin voru íslensk lög og farið með ljóð. Elsti árgangurinn teiknaði íslenskan fánann.

Slysavarnardeildin Líf kom færandi hendi og gaf öllum börnum leikskólans endurskinsmerki í dag. Þeim er annt um að allir noti endurskinsmerki og sjáist í skammdeginu. Við þökkum kærlega fyrir okkur.

Lögð hefur verið lokahönd á nýja Óveðursáætlun fyrir Leik- og grunnskóla Hvalfjarðarsveitar. Þar er farið yfir verkferla sem starfsfólk og foreldrar vinna eftir þegar óveður er. Áætlunina má finna undir gagnlegt efni hér á forsíðu og undir flipanum Stefnur og áætlanir undir Skólastarfið. https://skoli.hvalfjardarsveit.is/is/skolastarfid/stefnur-og-aaetlanir

Í morgun var haldin skipulögð rýmingaræfing í leikskólanum. Allir voru meðvitaðir um æfinguna og voru slökkviliðsmenn frá Slökkviliði Akraness og Hvalfjarðarsveitar til aðstoðar við framkvæmd. Æfingin gekk hún mjög vel og það tók innan við mínútu að rýma leikskólann.